Declaración de principios

català - castellano - français - english - italiano - occitan - asturianu - aragonés - esperanto

Maulets somos una organización política de xóvenes, independentista y revolucionaria, que llucha por unos Países Catalanes unificaos, independientes, ecolóxicos, non patriarcales y sin clases nuna sociedá na que les llibertaes colectives seyen les garantes de les llibertaes individuales.

Lluchamos poro pola construcción del socialismu a nivel mundial y en tolos ámbitos, como praxis humana lliberaora, que lleve al pueblu catalán hacia una organización social na que'l desarrollu de ca persona seya la condición previa al desarrollu de toos: el comunismu.

La nuestra tarea, como organización de xóvenes, abierta, participativa y asamblearia, ye organizar la llucha, concienciar a los sectores xuveniles de les clases populares y movilizalos, creando alternatives al orden social vixente. Maulets configúrase como una ferramienta de movilización, participación y llucha de los sectores populares de la xuventú catalana pa la consecución de la llibertá social y nacional del pueblu catalán.

Maulets lluchamos pola plena independencia nacional, entendía como l'exerciciu constante del derechu a la autodeterminación, pa asegurar l'existencia nacional de los Países Catalanes y la so llibertá social.

Maulets tomamos como marcu nacional de llucha los Países Catalanes (de Salses a Guardamar i de Fraga a Maó), y la so unidá territorial ye inseparable de la nuestra llucha como pueblu diferenciáu.

Maulets lluchamos pola instauración d'un modelu de sociedá sin clases, rechazando tolos sistemes y formes de dominación, d'explotación y d'opresión (económica, militar, patriarcal y ecolóxica). Poro, lluchamos pola creación y l'impulsu d'estructures sociales y práctiques individuales qu'abran pasu a un contrapoder popular qu'autoorganize y autoxestione de forma realmente democrática y participativa los recursos materiales y humanos de les clases populares. Un contrapoder que reconozca y asegure l'exerciciu de la llibertá en tolos ámbitos de la vida, nel que los individuos reafirmen y potencien al máximu tolos aspectos de la so personalidá.

Maulets parte del marxismu como base de la so llucha, entendiéndolu como un sistema completu y nun procesu de constante construcción y (re)ellaboración. Afuyimos, poro, de dogmatismos y posiciones reformistes que son frutu de la falta de perspectiva histórica. Utilizamos el materialismu históricu pa analizar los diferentes contextos socioeconómicos y creyemos inevitable la llegá d'un procesu revolucionariu que derribe'l sistema capitalista y la tiranía de los estaos (nel nuestru casu, estaos ocupantes) sobre les clases populares; concibimos, sicasí, la tarea revolucionaria de forma non inmovilista ni mecánica y participamos activamente nel procesu d'emancipación del pueblu catalán, a través de la construcción de proyectos inmediatos, rupturistes y contrahexemónicos. Entendemos polo tanto que les persones escriben la so propia historia pero en condiciones previamente determinaes e independientes de la voluntá individual. Sin embargu, Maulets busca la pluralidá y la unidá de tolos xóvenes anticapitalistes y antifascistes que lluchen pola independencia política de los Países Catalanes y admite nel so senu l'heteroxeneidad d'ideoloxíes ya interpretaciones de les lluches revolucionaries del nuestru pueblu.

Queremos incentivar y recuperar la riqueza de la nuestra cultura popular catalana entendía como forma de vida y d'expresión, y no como meru folklorismu. Son la llingua catalana, les fiestes populares, les tradiciones ancestrales, la gastronomía catalana, les músiques y les dances tradicionales... pilares básicos qu'hai que defender y extender contra l'actual colonización cultural.

Maulets, en llucha contra tolos sistemes de dominación, declárase feminista, ye decir, en contra d'una división xerarquizá y sexista de la sociedá. Maulets trabaya por una sociedá igualitaria sin discriminaciones de xéneru ni d'opción sexual.

Maulets, en llucha contra l'explotación destructiva del mediu ambiente -factor intrínsecu al métodu de producción capitalista- defiende un modelu socioeconómicu sostenible y no belixerante col entornu natural.

Maulets, en coherencia cola reivindicación tanto de la llibertá colectiva como de la individual, asume la defensa de tolos represaliaos por defender la lliberación social y nacional del pueblu catalán.

La nuestra llucha ye la llucha de tolos pueblos oprimíos del mundu. Creyemos nel internacionalismu como ferramienta pa extender y crear llibertá onde existe opresión. Maulets considera que la meyor forma de solidaridá colos pueblos del mundu ye la derrota'l capitalismu y l'imperalismu aquí, cola llucha revolucionaria y de lliberación del pueblu catalán.

Maulets defendemos el derechu históricu del nuesu pueblu, reconocíu internacionalmente pola Declaración Universal de Derechos Colectivos de los Pueblos, de dotase de tolos medios que considere convenientes en cada situación histórica pa alcanzar los nuesos derechos.

Maulets, como organización política de xóvenes, considérase parte integrante del Movimientu Catalán de Lliberación Nacional.

Quién somos - Declaración de principios - Países Catalanes - MCAN