Declaracion de principis

català - castellano - français - english - italiano - occitan - asturianu - aragonés - esperanto

Maulets qu'èm ua organizacion politica de joeni, independentista e revolucionària, que lute per uns Païsi Catalans unificadi, independenti, ecologics, non patriarcaus e sense classes en ua societat a on es libertats collectiues siguen es gatges des libertats individuaus.

Que lutam, alavetz, peth bastiment deth socialisme a nivèu mondiau e en toti es encastres, coma praxis umana liberadora, que pòrte eth pòble catalan entà ua organizacion sociau a on eth desvolopament de cadun sigue era condicion prealabla ath desvolopament de toti e de totes: eth comunisme.

Eth nòste prètzhèt, coma organizacion de joeni, daurida, participatiua e d'assemblada, ei d'organizar era luta, hèr a préner consciéncia as sectors juvenils des classes populares e mobilizar-los, en tot crear alternatiues ar orde sociau en vigor. Maulets se configure coma un estrument de mobilizacion, participacion e luta des sectors populars deth jovent catalan entar assolidatge dera libertat sociau e nacionau deth pòble catalan.

Maulets lutam pera plea independéncia nacionau, comprenuda coma er exercici constant deth dret ara autodeterminacion, entà pr'amor d'assegurar era existéncia nacionau des Païsi Catalans e era sua libertat sociau.

Maulets prenem es Païsi Catalans (de Salses enquia Guardamar e de Fraga enquia Maó) coma marc nacionau de luta, unitat territoriau indissociabla dera nòsta luta coma pòble diferenciat.

Maulets lutam pera instauracion d'un modèl de societat sense classes, en tot refusar toti es sistèmes e formes de dominacion, d'explotacion e d'opression (economica, militara, patriarcau e ecologica). Alavetz, que lutam pera creacion e er impuls d'estructures sociaus e practiques individuaus que daurissen pas a un contrapoder popular qu'autoorganize e autogerisque de manèra reauments democratica e participatiua es recorsi materiaus e umans des classes populares. Un contrapoder qu'arreconeishe e assegure er exercici dera libertat en toti es encastres dera vida, a on es individus reafirmen e poténcien ath maximal toti es aspèctes dera sua personalitat.

Maulets partís deth marxisme coma basa dera sua luta, en tot comprener-lo coma sistèma complèt e en procès de constant bastiment e (re)elaboracion. Hugim, donques, de dogmatismes e de posicions reformistes que son frut dera manca de perspectiva istorica. Utilizam eth materialisme istoric entà analisar es diferenti contèxtes socioeconomics e comprenem inevitable er adveniment d'un procès revolucionari que desròque eth sistèma capitalista e era tirania des estats (en nòste cas, estats ocupants) sus es classes populares; concebem totun, eth prètzhèt revolucionari de manèra non immobilista ne mecanica e participam actiuaments deth procès d'emancipacion deth pòble catalan, a trauès deth bastiment de projèctes immediats, rupturistes e contraegemonics. Atau, comprenem qu'es persones hèm era nòsta pròpria istòria mès laguens de condicions prèviaments determinades e independentes dera volontat individuau. Totun Maulets, que cerque era pluralitat e era unitat de toti es joeni anticapitalistes e antifascistes que luten pera independéncia politica des Païsi Catalans e admet era eterogeneïtat d'ideologies e interpretacions des lutes revolucionàries deth nòste pòble.

Volem estimular e recuperar era riquesa dera nòsta cultura populara catalana comprenuda coma manèra de vida e d'expression, e non coma simple folklorisme. Son era lengua catalana, es hèstes populares, es tradicions ancestraus, era gastronomia catalana, es musiques e dances tradicionaus... bases a deféner e esténer ena actuau colonizacion culturau.

Maulets, en luta contra toti es sistèmes de dominacion, se declare feminista, ei a díder, contra ua division jerarquizada e sexista dera societat. Maulets trabalhe per ua societat egalitària sense discriminacions de genre ne d'opcion sexuau.

Maulets, en luta contra era explotacion destructiua deth miei ambient -factor intrinsec ath metòde de produccion capitalista-, defen un modèl socioeconomic sostenible e non belligerant damb er entorn naturau.

Maulets, en coeréncia damb era reivindicacion tant dera libertat collectiua coma dera individuau, assumís era defensa de toti es represalhadi e totes es represalhades per deféner era liberacion sociau e nacionau deth pòble catalan.

Era nòsta luta ei era luta de toti es pòbles oprimidi pertot en mon. Credem en internacionalisme coma estrument entà esténer e crear libertat a on existís opression. Maulets considère qu'era melhora forma de solidaritat damb es pòbles deth mon ei era desbranda deth capitalisme e der imperialisme en cò nòste, damb era luta revolucionària e de liberacion deth pòble catalan.

Maulets defenem eth dret istoric deth nòste pòble, arreconeishut internacionauments pera Declaracion Universau des Drets Collectius des Pòbles, de dotar-se de toti es mejans que se considère convenenti en cada situacion istorica entà arténher es nòsti drets.

Maulets, coma organizacion politica de joeni, se considère part integranta deth Movement Catalan de Liberacion Nacionau.

Qui èm - Declaracion de principis - Es Païsi Catalans - MCAN